O concello de Ribeira será obxecto dunha nova actuación dirixida ao reforzo da rede de pluviais e á ampliación do saneamento na rúa Buenos Aires, única vía de entrada á parroquia de Corrubedo.
Desde o Concello sinalan que a zona onde se centra esta obra non ten a día de hoxe suficiente capacidade para recoller toda a auga superficial cando se producen chuvias intensas, o que motiva a acumulación de auga na calzada. Así mesmo, algúns tramos da rúa carecen de saneamento.
O proxecto técnico elaborado persegue por unha parte a mellora da rede de drenaxe da rúa Buenos Aires e por outra a ampliación do saneamento na marxe esquerda da vía.
No que respecta ao primeiro aspecto, instalarase un colector de PVC SN8 corrugado de 400 milímetros de diámetro e 188 metros de longo, así como 17 pozos de rexistro. En canto ao saneamento, colocarase unha tubaxe SN4 de 315 milímetros de diámetro e 120 metros de longo, ademais de 4 pozos de rexistro e 12 acometidas domiciliarias.
As obras teñen un orzamento de 57.781 euros, IVE incluído, e adscríbense ao Plan de Aforro e Investimento (PAI) da Deputación Provincial da Coruña. O prazo de execución son tres meses.
As empresas interesadas en presentar as súas ofertas dispoñen ata a medianoite do 9 de xaneiro a través da Sistema de Licitación Electrónica da Xunta de Galicia (SILEX).
