O domingo 19 celebrouse a Asemblea Xeral Ordinaria da entidade do Liceo Marítimo de Ribeira, na cal José Gude Pijuán saíu reelixido por unanimidade como presidente, cargo que afrontará por un período de dous anos; ademais de realizarse un importante cambio entre os membros da Xunta Directiva.
No transcurso da Asemblea tamén se adoptaron unha serie de decisións, entre as que figuran a colocación de lámpadas LED, de baixo consumo, en todo o local social. Así mesmo, atópanse estudando a posibilidade de instalar unha cadeira elevadora e afrontar a reforma dos aseos para persoas con mobilidade reducida.
Por outra banda, acordouse que os socios da entidade poidan realizar, de maneira gratuíta, calquera tipo de evento persoal ou familiar nos locais do Liceo Marítimo; así como a decisión tomada ao respecto de que a cafetería pechará ao público os sábados e domingos pola tarde, polo descanso do persoal. Ademais, comunicouse o incremento dun grupo importante de novas socias.
