Ribeira con 22 incidencias, Porto do Son con 18 e A Pobra do Caramiñal con 12 foron dos concellos mais afectados como consecuencia do forte temporal de chuvia que azoutou a comarca cara o mediodia de hoxe.
A intensa chuvia que caeu na comarca orixinou graves problemas en puntos de Corrubedo, Portosin, Artes, Pobra e Boiro entre outras localidades. Lesende en Lousame rexistrou 125 litros/m2 seguido de Sálvora con 101 litros/m2, foron os puntos con mais chuvia da comarca. A illa ribeirense chegou a recoller caseque 60 litros en apenas dúas horas do mediodia.
Ademais das fortes chuvias o maior problemas rexistrouse na parroquia ribeirense de Artes. Como consecuencia da auga caida o río Arlés desbordouse. O tráfico tivo que ser cortado e tivo que ser desviado para poder chegar a Corrubedo. Tamén esta parroquia tivo graves problemas e obrigou a intervir ás unidades de protección civil para liberar varios coches atrapados pola riada.
A circulación tivo problemas na rotonda de Xarás e na zona de Olveira onde apareceun socavón duns dous metros preto do colexio .
Protección civil GAEM de Ribeira tivo que intervir tamén en Castiñeiras polo desbordamento do rio Areeiros.
Na Pobra o rio Pedrás desbordouse na zona de Portocarro e orixinou problemas para cruzala ponte.
En Boiro e Rianxo tamén houbo importantes incidencias, ao igual que en todos os concellos da nosa contorna. Os grupos de Protección Civil dos concellos compartiron cos internautas un impresionante vídeo no que se aprecia claramente como a estrada que comunica Boiro con Noia viuse convertida nun río de lama, por mor das trombas de auga que caeron a media mañá e da terra que arrastrou polas abas do monte. O treito crítico rexistrado nas imaxes correspóndese co viario que pasa á altura de Tállara (estrada DP-1105), xa no concello de Lousame. O tráfico tivo que ser desviado pola ponte de San Francisco, cara ao Confurco.
O Concello de Boiro tamén compartiu cos internautas imaxes de pequenos asolagamentos nas beiras das estradas, ao tempo que pedía á veciñanza que estremase as precaucións nos seus desprazamentos
En Portosín a auga converteu o camposanto nunha lagoa. Xa pola tarde as precipitacións cesaron en intensidade a normalidade voltou á comarca.
