Para quen non o saiba a estas alturas, con todo lo que levamos andado, a comarca do Barbanza achega un dos mellores chans dos mundo para as andainas de longo alcance: por paisaxe, por natureza, por arquitectura, por patrimonio artístico e histórico, polas vistas das dúas rías que bañan as súas beiras e, por suposto, pola súa xente. Este é o material co que se constrúen as xeiras do colectivo deportista Camiñadas do Barbanza, a comunidade de sendeiristas da comarca, que nos convidan a participar este domingo na súa primeira ruta do ano: unha que vai dende Corrubedo até a igrexa do Xobre na Pobra. A este primeiro treito engadiráselle outros novos (cinco rutas) ao longo das semanas vindeiras, así até completar a ruta comarcal xacobea até Santiago (culminando en Santiago, perante a catedral).
O punto de encontro deste domingo 12 de xaneiro será o porto de Corrubedo, ás 10.00 horas. A camiñada prevista, segundo informa a asociación, constituirá un xeito de reclamar “a oficialidade do Camiño de Santiago dende o faro”, unha proposta que ten o apoio da Mancomunidade Arousa Norte e da que se farán eco os próximos roteiros colectivos.
O itinerario deste día 12 pasará pola contorna natural das dunas de Olveira e Corrubedo, pola contorna do vilar e o núcleo do mesmo nome (xa en Carreira), polos Paramos e Martín, polo centro de Ribeira, polo núcleo antigo de Deán Grande (Ribeira), polo casco antigo de Palmeira, polo Campiño, polo pazo da Torre de Xunqueiras, polo Castro e pola igrexa do Xobre na Pobre, onde rematará o percorrido. As e os camiñantes que estean interesadas e interesados en participar, poden inscribirse chamando aos teléfonos 981 832 590 ou 619 229 946. A andaina contará coa presenza activa dos guías Pepe Moure e Suso Dieste.
