Dúas citas deportivas congregarán a numerosos atletas na Pobra

A Pobra do Caramiñal converterase en epicentro do deporte nesta fin de semana coa celebración do Campionato Provincial de Campo a Través e o XXXIV Campionato de Galicia Máster de Campo a Través Individual e Clubs. Os encargados de desvelar os detalles destes eventos foron o alcalde Xosé Lois Piñeiro; a concelleira de Deportes, Genoveva Hermo; o presidente da Asociación de Atletismo e Deportes do Barbanza, José Moure; e o vicepresidente da Federación Galega de Atletismo, Iván Sanmartín.

A edil Genoveva Hermo e José Moure explicaron as características de ambos campionatos.

O circuíto de Cabío dará cabida o 1 de febreiro ao Campionato Provincial de Campo a Través, no cal poderán participar tódolos clubs e colexios clasificados nas correspondentes fases intercomarcais das zonas da Coruña, Ferrol, Noia e Santiago, formalizando previamente a súa inscrición, ademais de ter feita a mutualización obrigatoria dos corredores. As categorías que tomarán parte desta cita son Benxamín, Alevín, Infantil e Cadete, tanto masculino coma feminino. Así mesmo, estableceranse dúas clasificacións: individual e por equipos. A entrega de dorsais efectuarase ás 10.00 horas ou 30 minutos antes da proba correspondente na que se participe; mentres que o desenvolvemento da competición será a partir das 11.15 horas para, ás 13.45 horas, proceder coa entrega de medallas aos tres primeiros clasificados individuais de cada modalidade, e trofeos aos tres primeiros equipos clasificados de cada unha, así como medallas aos integrantes dos mesmos. Organizan o Servizo de Deporte da Coruña, da Secretaría Xeral para o Deporte da Xunta de Galicia; colaborando o Concello, a Federación Galega de Atletismo, Agrup. Dep. Escolar As Rías e A. D. do Barbanza.

Ademais, o 2 de febreiro desenvolverase tamén no circuíto de Cabío o XXXIV Campionato de Galicia Máster de Campo a Través Individual e Clubs, organizada pola Federación Galega de Atletismo e o Concello. Poderán participar todos aqueles atletas federados, tanto homes coma mulleres, que teñan fichado ao longo da tempada actual por algún club pertencente a Galicia; con ficha pola Federación aínda que pertenzan a clubs doutras comunidades autónomas; ou non galegos convidados expresamente pola Federación, que non reúnan ningunha das anteriores condicións. A hora de inicio do campionato establécese ás 11.30 horas para, ás 13.45 horas, entregar os premios. Facilitaránselle medallas aos tres primeiros atletas clasificados a nivel individual, así como trofeos aos tres primeiros equipos clasificados en cada unha das categorías.

Pola súa parte, Iván Sanmartín destacou que A Pobra é “hoxe por hoxe, un dos concellos de Galicia que está ao nivel de grandes cidades en número de probas federadas que se organizan”, constituíndo para a institución que representa toda unha honra, tal e como apuntou.

Na súa intervención, o rexedor Xosé Lois Piñeiro expresou o seu agradecemento a todos os que fan posible estes eventos deportivos que se celebrarán, segundo precisou, nun “escenario espectacular, case inmellorable”, tanto no aspecto técnico coma paisaxístico.