A Casa da Cultura Raquel Fernández Soler da Pobra do Caramiñal albergará esta tarde, ás 17.30 horas, a derradeira visita guiada da exposición itinerante As pegadas do Camiño de Santiago no Barbanza: A Orixe. Dita mostra reflicte por medio de fotografías as evidencias históricas da ruta xacobea entre Corrubedo e Santiago, percorrido que foi presentado en sociedade o 19 de decembro de 2019 en Compostela.
Organizada pola Asociación Amigos do Camiño de Santiago do Barbanza. A Orixe, o comisario da exposición e director do Museo Valle-Inclán, Antonio González Millán, será quen exerza de guía, sendo a entrada libre.
Os interesados aínda poderán achegarse no día de mañá, venres 31, para contemplar os documentos visuais, en horario de 11.00 a 13.30 e de 17.00 a 20.00 horas.
A recuperación do camiño terrestre que transita polos municipios de Ribeira, A Pobra do Caramiñal, Boiro, Rianxo, Dodro, Padrón e desde Iria Flavia ata Santiago, é o resultado de dous anos de traballo coa fin de facer aflorar e poñer en valor as pegadas da tradición xacobea nas terras do Barbanza.