O Espazo Xuvenil de Ribeira, situado no edificio do mercado municipal, será escenario a partir de mañá, sábado 25, dunha nova acción destinada á mocidade denominada Sábados de cinema no Espazo Xuvenil. Ribeira no Camiño. O Teu Xacobeo. Trátase dun workshop de gravación de curtametraxes, prolongándose durante tódolos sábados ata o mes de abril, en horario de 17.00 a 21.00 horas. A de mañá consistirá nunha primeira toma de contacto para explicar o contido do proxecto.
Ao logo do taller realizarase un piloto a partir dunha peza de recoñecida sona vencellada ao Camiño de Santiago. Dito piloto estará baseado na obra Pórtico da Gloria, de Villaamil, cuxa presentación dará pé ao estudo das obras de arte xacobeas, facendo fincapé nas que rodean ao itinerario que nace en Corrubedo: A Orixe.
Do cadro ao vídeo, do intre ao movemento, os asistentes irán indagando no contexto da obra plástica: cales foron os momentos no seu caso ou as circunstancias que levaron á creación do intre reflectido na obra plástica, entre outros aspectos. É dicir, o contexto segundo o artista ou segundo a escena representada na obra.
Así, supón observar a obra e deixala fluír, contar o antes ou o despois, de ficcionar unha obra plástica partindo dun flash e deixar fluír ao movemento. A historia pode partir dun guión inventado ou adaptación do realmente acontecido no caso de dispoñer de referencias.
