O deporte tomou a palabra este venres pola noite. E fíxoo da man da Mancomunidade de concellos de Arousa Norte, que entregou os premios da cuarta edición do circuíto popular 4 carreiras, 1 meta que promoveu a entidade de Barbanza. Os galardóns concedéronse no Auditorio Municipal de Ribeira. Foron recoñecidas un total de 70 persoas, que recolleron os seus trofeos da man das/os técnicos de deportes, concelleiros e rexedores dos municipios da Pobra do Caramiñal, Boiro, Rianxo e máis Ribeira. Tamén participou na gala o presidente da Federación de Atletismo, Isidoro Hornillos.
As distincións entregadas abrangueron as categorías absolutas, sub-10, sub-12, sub-14, sub-16, sub-18, sub-20, sub-23, sénior, grupos máster femininas e masculinas, e clubs federados e asociacións. Tamén foi incluída a modalidade de conciencia social destinada a persoas con diversidade funcional, Sapatilla inclusiva.
Arousa Norte lembrou na gala que a súa aposta polo deporte e o turismo deportivo é unha aposta en firme, xa que “é unha práctica popularizada hoxe en día e que xera fluxos de persoas que viaxan para practicar a súa afección”. Ao fío disto, a mancomunidade recordou aos presentes que “temos excelentes clubs deportivos que aglutinan a moitas e moi boas corredoras e corredores, hoxe aquí presentes”. Tamén enxalzou as “paisaxes espectaculares para a práctica deportiva” e a longa listaxe de atractivos dos concellos integrante, ao que cómpre engadir o destacado esforzo dos responsábeis das administracións locais e dos técnicos deportivos “por organizar as prestixiosas carreiras populares que se fan na comarca”.
O acto estivo conducido polo xornalista deportivo Terio Carrera e a humorista galega Isabel Risco.
