Amicos traballará arreo polo turismo respectuoso co medio ambiente

07 Xaneiro 2020

A sede da Asociación Amicos, colectivo barbanzán de familias de persoas con diversidades cognitivas, trastornos de autismo e parálise cerebral, acolleu hoxe a presentación dunha iniciativa para fomentar novos xeitos (alternativos, sustentábeis, racionais, eficientes, intelixentes) de xerar riqueza e emprego a través do turismo costeiro. O proxecto Intercostas, no que participa activamente Amicos e cuxa primeira acción formativa púxose en marcha hoxe, estase a impulsar coa colaboración da Fundación Biodiversidade do Ministerio para a Transición Ecolóxica, a través do Programa Empleaverde co-financiado polo Fondo Social Europeo.

Segundo se fixo saber, o gran obxectivo é “dar resposta a varias problemáticas relacionadas coa crecente desigualdade social e os inminentes efectos do cambio climático sobre o planeta”. Intercostas pon o punto de mira no turismo porque esta actividade produtiva, por outra banda tan importante para a economía do Barbanza e de Galicia, é responsábel do 10% das emisións de carbono a nivel mundial (o chamado “turismo descontrolado”). O proxecto dado hoxe a coñecer busca achegar alternativas racionais e respectuosas co medio, ao tempo que relevantes dende o punto de vista económico e do emprego.

Co fin de “mellorar o actual escenario”, Intercostas proponse capacitar as persoas na xestión de produtos e servizos turísticos inclusivos e sustentábeis nos espazos mariños da Rede Natura 2000 de ámbito costeiro, en concreto, do espazo marítimo-terrestre das Rías Baixas (Galicia) e o espazo marítimo-terrestre do Mar de Alborán (Andalucía).

Amicos contará coa colaboración da asociación andaluza A Toda Vela para impulsar novas oportunidades laborais no ámbito da economía azul, “tentando xerar impacto directo na empregabilidade das persoas con discapacidade intelectual, mulleres rurais, mozas e mozos menores de 35 anos, persoas inmigrantes, residentes en áreas protexidas e maiores de 45 anos en situación de desemprego”, informaron os responsábeis de Amicos, engadindo que o devandito “conseguirase a través da posta en marcha de sete accións formativas gratuítas, que collerán corpo en Andalucía e Galicia”. Estas sete accións son as que citamos deseguido:

Formacións en Galicia

· Axentes ambientais e do cambio climático no patrimonio natural mariño.

· Recollida, monitoraxe e limpeza de residuos mariños.

· Valorización de refugallos mariños.

· Roteiros turísticos mariñeiros inclusivos.

Formacións en Andalucía

·Roteiros turísticos mariñeiros inclusivos.

· Dinamización e interpretación turística azul.

· Comercialización de produtos e servizos turísticos azuis.

Outros artigos

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...

+

“O Barbanza: Cinco anos de xornalismo independente”

Hai cinco anos, en maio do 2019 nacía na súa edición dixital obarbanza.gal e uns días despois na de papel O Barbanza, sempre en galego e baixo a cobertura do Grupo Código Cero Comunicación. Dicíamos daquela que eramos un grupo de profesionais decididos a aventurarnos...

+

Día das Letras pasado por auga e temperaturas suben baixas

Continuamos durante o venres con inestabilidade atmosférica. Con esta situación, agárdanse intervalos nubrados con chuvascos acompañados de tormenta. As temperaturas continuarán sen cambios ou con lixeiros ascensos das máximas. Os ventos soprarán do noroeste, frouxos...

+

Publicidade

Revista en papel

Opinión