O Concello de Boiro súmase á campaña da Dirección Xeral de Tráfico (DXT) para o control de velocidade, fomentando así a seguridade no municipio. Neste senso, a Policía Local disporá ata o 4 de febreiro dunha furgoneta equipada con cinemómetro.
Esta medida enmárcase nas accións que o corpo policial leva a cabo coa intención de garantir unha maior seguridade en materia de mobilidade e reducir os accidentes por excesos de velocidade. De feito, sinalan que o maior problema por incidencias en excesos de velocidade se atopa nas estradas periféricas, polo que se incidirá especialmente nestas zonas.
Paralelamente, a Policía Local participa nunha campaña especial de vixilancia das condicións dos vehículos, en colaboración coa DXT, mediante a realización de controis para comprobar se os vehículos levan ITV e seguro obrigatorio en vigor, ademais de revisar elementos de seguridade tales coma pneumáticos, luces, parabrisas e sinalización.
