A estratexia de desenvolvemento Máis Ribeira Atlántica contempla catro liñas de actuación

30 Xaneiro 2020

O salón de plenos da Casa Consistorial de Ribeira serviu de escenario no día de onte para unha reunión informativa na que se lles explicou aos grupos da corporación municipal o estado de tramitación da EDUSI Máis Ribeira Atlántica 2020, Estratexia de Desenvolvemento Urbano Sostible e Integrado seleccionada en primeira convocatoria para a dotación de Fondos Europeos de Desenvolvemento Rexional (FEDER) dentro do Programa Operativo Plurirrexional de España (POPE) 2014-2020. Abundando na mesma liña, hoxe tivo lugar unha reunión de carácter técnico para seguir perfilando un proxecto cuxo orzamento ascende a 6.250.000 euros, dos cales 5 millóns corresponden aos devanditos fondos FEDER.

Na xuntanza de onte -á cal  asistiron edís dos grupos do PP, BNG, PSdeG-PSOE e Suma Ribeira- detallouse que a estratexia contempla catro liñas de actuación: ‘Ribeira + Intelixente’, cunha contía de 900.000 euros; ‘Ribeira + Eficiente’, con 1’5 millóns asignados; ‘Ribeira + Turística’, con 1’6 millóns; e ‘Ribeira + Humana’, con 2 millóns.

Actualmente está executado o 21% do global por un importe económico de 1.338.560’07 euros; e a estratexia ten que estar totalmente implantada en decembro de 2023.

Dentro da liña ‘Ribeira + Intelixente’, a cal ten como obxectivo promover as TIC a través de actuacións de Administración electrónica local e Smart Cities, inclúense tres actuacións ou operacións: Smart Instalacións Auditorio (300.000 euros), Centro de Control de Servizos Municipais (300.000 euros) e accións ligadas coa E-Administración (300.000 euros).

Na liña ‘Ribeira + Eficiente’, orientada ao fomento da mobilidade urbana sustentable e a mellora da eficiencia enerxética e o aumento de enerxías renovables nas áreas urbanas, están consignados 500.000 euros para paseos marítimos, outros 500.000 para iluminación eficiente -coa instalación de luminarias en diversos tramos de litoral en Aguiño, O Carreiro, A Catía, O Castro e Insuela- e outros 500.000 para a mellora da eficiencia enerxética en edificios públicos, sinaladamente A Fieiteira e o Conservatorio.

En ‘Ribeira + Turística’, concibida coa finalidade de promover a protección, fomento e desenvolvemento do patrimonio cultural e natural, así como a revitalización das cidades e a mellora da contorna urbana e o seu medio ambiente, hai 50.000 euros para a iniciativa ‘aMar Ribeira’, 750.000 euros para creación de sendeiros fluviais e rutas de sendeirismo e 800.000 para a xa executada remodelación do paseo do Malecón.

Por último, a liña ‘Ribeira + Humana’ persegue a rexeneración física, económica e social da contorna urbana en áreas desfavorecidas. Hai dúas operacións previstas: dun lado, a construción do novo Auditorio -cunha partida de 1’9 millóns de euros- e, por outra, a creación de vivendas sociais -100.000 euros-.

No transcurso do encontro, o cal, segundo manifestan, resultou “moi participativo”, tamén se buscaron as aportacións dos propios grupos para dotar de contidos a algunhas das operacións nas que non están definidas as intervencións concretas a executar coma, por exemplo, o caso da habilitación de sendas fluviais e rutas de sendeirismo, ademais das vivendas para fins sociais dentro do municipio.

Así mesmo, manifestan que proximamente se convocará a comisión estratéxica de Máis Ribeira Atlántica.

Outros artigos

Ribeira pon en valor o traballo das mulleres no mar

O Concello de Ribeira conmemorou o Día Internacional da Muller no Sector Marítimo rendendo unha homenaxe a tres mulleres extraordinarias que dedicaron as súas vidas a unha profesión fundamental para a nosa comunidade: o marisqueo. O concelleiro de Mar, Fernando...

+

Publicidade

Revista en papel

Opinión