A Real e Ilustre Cofradía da Dorna rematou o ano pletórica de novidades, algunhas delas moi relevantes para o seu futuro (por exemplo a elección de Ramón López Martínez como novo presidente da entidade, que é, como lembraremos, a responsábel de organizar cada ano a Festa da Dorna de Ribeira e o programa de actividades cada vez máis descentralizado que a acompaña).
O capítulo de incidencias no caderno de bitácora deste remate de 2019 comezou co galerna mediática provocada por unha nova edición de La Bos de Jalisia, o xornal dorneiro co que se conmemora a chegada da que vén sendo, dende tempos inmemoriais, a celebración mundial das fake news, a do 28 de decembro. Para quen aínda non tivera oportunidade de carrexar un exemplar para a casa e gardalo coma un tesouro do que botar cando veñan tempos difíciles, dicir que está dispoñíbel en libre descarga no Facebook da Cofradía (en formato PDF). Inclúe, entre outros contidos de investigación, unha relación detallada do patrimonio dos principais representantes políticos do concello.
Na mesma xornada, a entidade fixo saber que contará a partir de xa con nova directiva e novo presidente, Ramón López Martínez, logo dunha xuntanza da asemblea dorneira moi concorrida na que se lle desexou ao equipo de Ramón “a mellor marea e o máis conveniente vento do nordés”.
O 28 de decembro a Cofradía tamén deu a coñecer as entidades destinatarias dos seus premios aDorna, que foron dar a AGADEA Alzheimer e a FAIBEN, Fundación de Apoio á Infancia e ao Benestar, nas categorías de entidades e de centros educativos, respectivamente.
As dúas organizacións levaron 400 euros de contía grazas aos recoñecementos dorneiros.
Igualmente, fíxose unha doazón a cargo do Fondo Social Dorneiro de 300 euros a cada unha das seguintes entidades colaboradoras: Cáritas Parroquial, Cruz Vermella, AGADEA, AMBAR e A Creba.
A maiores de todo o devandito, a Cofradía quixo botar unha man a todas aquelas veciñas e veciños que aínda nas alturas do 3 de xaneiro non deran atopado ningunha petición digna de ser incluída nas súas cartas aos Reis Magos. A Cofradía recomendoulles rematar coa cuestión cun agasallo que vén moi a conto nestas datas: as pantuflas dorneiras.