A sede da Asociación de Empresarios de Ribeira albergou na tarde de onte o sorteo dos 4.500 euros da campaña de Nadal que se desenvolveu desde o 9 de decembro ao 6 de xaneiro para contribuír á dinamización económica do municipio. Unha iniciativa na que mercar e consumir durante as pasadas datas redundou en numerosos premios en vales de compra: un de 500 euros, dez de 250, dez de 100 e dez de 50. Ademais, nomeáronse suplentes. Os agraciados dispoñen ata as 19.30 horas do 31 de xaneiro para reclamar os premios.
O sorteo realizouse ante notario e asistiron o presidente da Asociación de Empresarios de Ribeira, Francisco Martínez, ademais doutros membros da Xunta Directiva.
