Quico Cadaval, Celso Sanmartín e José Luis Gutiérrez (Guti) subiranse ás táboas do pobrense Elma o domingo 15, ás 19.00 horas, con Tres vellas (polo menos). No repertorio dos tres hai moitos contos que foron relatados por vellas, a quen llos narraron outras. A sinopse do espectáculo presenta unha progresión xeométrica de vellas. Nunca se coñeceron as vellas dos tres relatores, mais poderían manter unha conversa entre si á luz do carburo ou sobre o hule das cociñas aldeás. Moitas veces, as sesións de contos son sesións de espiritismo, e as vellas aparecen na axuda do narrador que se perdeu nun chiste, ou nun comentario de actualidade, e faino volver ao rego do relato.
A entrada é libre e ata completar aforo. Esta actividade enmárcase no bloque destinado a maiores de 16 anos da programación teatral organizada pola Concellería de Cultura da Pobra do Caramiñal en colaboración coa Rede Cultural da Deputación da Coruña.