O pobrense Elma continuará sendo escenario no que resta de ano de representacións de pezas teatrais dirixidas a un público infantil e familiar, as cales se adscriben ao Nadal Cultural.
Teatro Ghazafelhos recala con Rubicundo o xoves 26, ás 18.30 horas. Unha historia sobre a amizade, a constancia e a poesía, abrindo a posibilidade de perseguir os soños sen sentir fronteiras.
O venres 27, ás 18.30 horas, Culturactiva presenta a Félix Rodríguez e Fran Rei en Saaabor! Trátase dun espectáculo cómico que mestura música, maxia, humor, ritmo e participación do público, co mundo da gastronomía de fondo.
Por último, A toupiña que quería saber quen lle fixera aquilo na cabeza chega da man de Xanela do Maxín ás 18.30 horas do luns 30. Deste xeito, acompañarase a este mamífero na súa investigación pola granxa co obxectivo de coñecer que animal dos que viven alí lle fixo semellante agravio.
A entrada a tódalas citas é libre e ata completar aforo. As actividades están organizadas pola Concellería de Cultura da Pobra do Caramiñal en colaboración coa Rede Cultural da Deputación da Coruña.
