O calendario de actividades de Nadal no municipio de Ribeira suma un evento deportivo, que terá ademais carácter benéfico. Trátase do I Trofeo Nadal de Fútbol Sala Cidade de Riveira, o cal se disputará no pavillón polideportivo Alcalde Torres Colomer, na parroquia de Palmeira, a partir das 16.00 horas do 28 de decembro. Así o deron a coñecer esta mañá a concelleira de Deportes, Juana Brión; a súa homóloga de Servizos Sociais, Ana Ruiz; e o presidente da Agrupación Futsal Riveira -entidade promotora da iniciativa-, Vicente Fiel.
A idea xurdiu entre os membros da Agrupación Futsal Riveira que se encargan nos últimos tempos da organización do campionato local de fútbol sala, o cal conta con 28 edicións, coa intención de encher un oco no tradicional parón desta época. Neste senso, Vicente Fiel destacou a “moi boa acollida” desta cita deportiva entre o mundo do fútbol sala, agardando que sexa “a primeira pedra para que en anos vindeiros poidamos seguir sendo todos un pouco solidarios que é do que se trata nestas datas.” Así mesmo, expresou o seu agradecemento ao Concello e informou da posibilidade de participación de equipos integrados por persoas con discapacidade.
A edil Juana Brión anunciou que xa hai confirmados varios equipos de Ribeira, tanto masculinos coma femininos, así como doutros concellos. Tamén expuxo que a intención é darlle continuidade nos próximos anos, chegando á súa consolidación.
Pola súa parte, a concelleira Ana Ruiz incidiu no carácter solidario desta cita, polo que se solicita a doazón de alimentos non perecedoiros, xoguetes novos e material escolar, tanto por parte dos participantes coma do público. A este respecto, avanzou que o recadado será distribuído entre as asociacións benéficas Cáritas, Cruz Vermella, ICE Renovación e Dignidad Ribeira.
En canto ás características da competición, consistirá nun torneo express con partidos moi curtos para darlle participación a todo o mundo. Ademais, a vindeira semana daráselle forma ao calendario. A inscrición é gratuíta, permanecendo o prazo aberto ata o 27 de decembro.
