Os clubs náuticos da nosa comarca, a través da plataforma galega ASNAUGA, tiveron presenza en París, os días pasados, co gallo da celebración do Salón Náutico Internacional que se desenvolveu entre o 7 e o 11 de decembro. Xunto cos outros clubs da xeografía galega adicáronse a promover o rico potencial (en materia de servizos, paisaxe, calidade, oferta, gastronomía, etc) do turismo náutico galego. Na cita participaron os representantes das entidades deportivas, a directora de Turismo de Galicia, Nava Castro e a presidenta de Portos de Galicia, Susana Linguas.
Segundo informaron, ao abeiro do salón foron mantidos unha chea de encontros con medios de comunicacións, empresas e asociacións náuticas francesas, co fin de presentarlles a oferta galega. ASNAUGA tivo o seu centro de operacións na caseta que Turismo de Galicia e Portos instalaron na feira.
Alí lembraron que os portos deportivos de Galicia recibiron o pasado ano máis de 10.000 embarcacións recreativas e que Francia foi o sexto país que máis embarcacións recreativas enviou ás nosas costas, só por detrás de Portugal, Alemaña, Estados Unidos, Italia e Reino Unido. Os 73.000 viaxeiros procedentes de Francia que atracaron os seus barcos nos portos deportivos galegos pasaron un total de 121.000 noites.
O Salón Náutico Internacional de París é o acontecemento náutico máis importante que se celebra en Francia e unha das grandes citas mundiais do sector. En 2018 contou con 206.000 visitantes, asentados sobre unha superficie de máis de 300.000 metros cadrados, e máis de 800 expositores.