A pasada fin de semana recalou no Conservatorio Municipal de Ribeira ‘Enrique Paisal’ un novo encontro da Aula Galega de Saxofón, reunindo a dezaseis alumnos e alumnas procedentes de centros de toda a comunidade autónoma.
Nesta ocasión, ademais de co titor Rodrigo Vila, a iniciativa contou coa participación de dous profesores convidados: o saxofonista estadounidense Phil Pierick, afincado en Chicago e con múltiples galardóns no seu currículo (gañador do Concurso Internacional de Saxofón Jean-Marie Londeix e do Concurso Internacional de Saxofón ISSAC e tres veces vencedor nos Concursos Nacionais de Novos Artistas e de Música de Cámara MTNA, entre outras distincións); e da pianista mallorquina Neus Estarellas, tamén galardoada en numerosos certames coma o Karlsruher Wettbewerb für Zeitgenössische Musik, Premi Primer Palau Barcelona, Premi de Música de Manresa, Arjau, Art Jove, Concurs Rotary Club Palma de Mallorca, etcétera.
Ademais, o alumnado da Aula ofreceu tres audicións que tiveron lugar o venres, ás 21.00 horas, o sábado, ás 19.00 horas, e o domingo, ás 13.15 horas. Cada unha das audicións rematou coa actuación dos tres profesores.
