O Club Ciclista Barbanza, coa colaboración do Concello de Boiro, organiza para este venres 6 o XXXIII Trofeo Ciclocross, o cal se disputará a partir das 09.30 horas coas distintas categorías, estando prevista a entrega de premios para as 14.15 horas. Á presentación deste evento asistiron o concelleiro de Deportes, Marcos Fajardo; o presidente do Club Ciclista Barbanza, Ricardo Riveiro; e o técnico da Federación Galega de Ciclismo, Guillermo Sande.
A proba conta con ao redor de 400 inscritos e está aberta para as categorías Élite-Sub 23 masculino e feminino; Júnior masculino e feminino; Cadete masculino e feminino; Máster feminino; Máster 30/40/50/60 masculino; e Promoción. O presidente do Club Ciclista Barbanza, Ricardo Riveiro, destacou que “na proba participan equipos de toda Galicia e tamén outros asturianos e portugueses.”
Pola súa parte, o técnico da Federación Galega de Ciclismo, Guillermo Sande, afirmou que “o circuíto está no calendario galego e tamén nacional e é un circuíto moi atractivo ao ser moi rápido e dinámico e que moitos corredores o usan para prepararse de cara á próxima temporada.”
Mentres tanto, o edil Marcos Fajardo falou da importancia deste circuíto de ciclocross e tamén da súa beleza, pois celébrase no entorno de praia Xardín, mesturando litoral e montaña.
