O Concello de Boiro realizou nas últimas semanas as actuacións de ampliación e mellora do ximnasio da piscina municipal co obxectivo de que puidese cumprir as necesidades dos usuarios. Neste senso, duplicouse o tamaño da instalación, pasando de 90 metros cadrados aos 202 actuais, ademais de executar a intervención con criterios de sustentabilidade ambiental e redución de consumos enerxéticos.
As obras supuxeron unha inversión de 81.000 euros, dos cales a Secretaría Xeral para o Deporte aportou en torno a 60.000 euros. A nova cimentación efectuouse cun sistema realizado a base de plásticos reciclados e a estrutura da cuberta componse de madeira laminada e rematada cun panel que permita o máximo illamento térmico co obxectivo de evitar que se acaden temperaturas moi altas no interior.
No que respecta á iluminación, a base de lámpadas tipo LED, preténdese reducir nun 60% o consumo. En canto ao novo sistema de renovación do aire, este suporá un aforro enerxético, xa que se empregará unha estrutura dinámica de renovación que permite unha calidade óptima do aire interior.
O espazo, que está a disposición dos usuarios desde o 5 de decembro, recibiu este mediodía a visita do alcalde de Boiro, José Ramón Romero; o concelleiro de Urbanismo e Obras, José Luiz Ruiz; o secretario xeral para o Deporte, José Ramón Lete; e o arquitecto municipal, Emilio Piña.
O rexedor José Ramón Romero afirmou que esta intervención era unha demanda de moitos anos, polo que “con esta remodelación integral que supuxo este ximnasio, vén a cubrir as demandas dos veciños de Boiro.” Así mesmo, salientou o emprego de materias procedentes de empresas españolas.
Pola súa parte, o secretario xeral para o Deporte, José Ramón Lete, reiterou o compromiso xeral do seu Departamento cos concellos e destacou a utilización de produtos reciclados no referido espazo. Neste senso, manifestou que “non só temos unha nova instalación para Boiro, necesaria e unha reclamación que se fixera hai tempo para que hoxe sexa unha realidade; senón que, ademais, nos alegramos moitísimo de que se tivese esta sensibilidade para facelo con material reciclable.”
