O vídeo Ti decides da Polícia Local de Rianxo achégase ao milleiro de reproducións

O vídeo da Policía Local de Rianxo do que falamos en detalle os días pasados, con motivo da súa presentación o 19 de decembro, está a ser un éxito de visitas na rede social YouTube, onde xa anda moi preto (este martes 24 pola mañá) do milleiro de reproducións.

A peza audiovisual, que como lembraremos está dirixida a concienciar á cidadanía da necesidade de deixar de lado as drogas e o alcol de ter que facer desprazamentos por estrada nestas datas (nas que, por outra banda, tanto se conduce por estradas secundarias e principais, co agravante de que boa parte destes desprazamentos son de noite e con malas condicións de visibilidade), está a recibir unha cantidade importante de votos positivos dos usuarios da dita rede social.

Baixo o lema Ti decides e cunha duración de ao redor de seis minutos, a cinta comeza con acción e remata con drama. Malia que ten a súa orixe en Rianxo, conta cunha visión comarcal e colectiva do problema de seguridade que implican as drogas e o alcol ao volante, de aí que entre os “protagonistas” do vídeo tamén haxa xente Pobra do Caramiñal ou de Boiro. Amais da Policía Local e o Concello, colaboraron na iniciativa as agrupacións locais de Protección Civil, bombeiros e ambulancias e a propia veciñanza de Rianxo e os devanditos concellos de Barbanza.