A Asociación Cultural Barbantia, Medulia Editorial, La Voz de Galicia e o Concello de Ribeira van organizar antes do remate do ano un novo encontro arredor das nosas letras e o lume creativo, sempre vivo, das autoras e autores da nosa comarca. Estamos a falar da saída do prelo do número 150 de A Voz de Barbantia (Medulia), que se presenta en Ribeira este venres 20 ás 20.30 horas no Centro Cultural Lustres Rivas de Ribeira. Amais disto, o outro prato forte da cita deste venres será a presentación de Á sombra da cinza, do escritor ribeirense Fidel Vidal.
Contarase coa presenza de Encarga Pego, membro de Barbantia, Xulio L. Varcálcel, poeta e narrador, Antón Riveiro Coello, escritor e membro de Barbantia e Manuel Ruíz, alcalde de Ribeira.
Respecto de Á sombra da cinza, vén da man do escritor e psiquiatra ribeirense Fidel Vidal, e trátase dun ensaio sobre o local (o máis noso), o íntimo, o cotián, por unha banda, e o universal, pola outra, e de que maneiras acaídas podemos facer confluír estes conceptos, a través (por exemplo) da poesía. O libro, que inclúe ilustracións realizadas polo propio autor, é un convite a viaxar pola nosa alma na procura do entendemento e a comprensión.