O PSdeG-PSOE de Ribeira vén de emitir un comunicado no que expresa a súa opinión sobre o futuro da EDAR. A formación socialista sinala que, a pesar de que tódalas obras foron executadas e recibidas inicialmente por Acuaes e que está estipulado que esta empresa ten fixado entregar a obra a Augas de Galicia (para o seu uso público mediante acto formal) o 30 de decembro deste ano; segundo a resolución do pleno celebrado en agosto, mentres non se realice e se aprobe a auditoría externa o Concello non recepcionará a referida obra.
A agrupación engade que todo o importante e complexo conxunto de infraestruturas da EDAR “non debe ser recepcionado, en ningún caso, en tanto non estean estas instalacións certificadas no seu bo funcionamento (todas elas) pola auditoría externa esixida na resolución do pleno do Concello do pasado 23 de agosto.”
Por todo iso, o grupo municipal socialista considera que “debe ser Augas de Galicia quen corra co gasto que orixine a obra en tanto esta non sexa recepcionada polo Concello, cousa que non debe ocorrer ata que se aprobe a auditoría externa.”
