O Museo do Gravado de Artes (Ribeira) vai inaugurar este venres 13 de decembro unha mostra sobre un dos máis grandes artistas contemporáneos, tanto se atendemos ao estilo no que foi encadrado (o post-impresionismo) coma se nos referimos a todas as correntes pictóricas e categorías artísticas diversas que tiveron a súa orixe na recta final do século XIX e chegan aínda vivas aos nosos días. Estamos a falar de Henri Marie Raymond Toulouse-Lautrec, do que se nos vai ofrecer unha serie importante de gravados.
A mostra Toulouse-Lautrec: Elles (1890) – Litografías (1893-1900) será inaugurada ás 20.00 horas do venres na sala de exposición número 2 do Museo de Gravado de Artes, en Ribeira. A escolma artística, que está comisariada por José Daniel Buján Núñez e coordinada por X. Pastor Rodríguez, director do Museo do Gravado, poderá visitarse até o 22 de xaneiro. A exposición mostra 36 obras litográficas do artista francés e, tamén, unha escolma bibliográfica da súa importante e (aínda agora) vixente obra.
