A ribeirense praza da Porta do Sol contará a partir das 18.00 horas de mañá, venres 20, cun Mercado de Nadal integrado por un total de 16 postos. Así, os visitantes poderán mercar diversos produtos tales coma adornos, plantas, doces, regalo, téxtil, artesanía, marroquinería, xoiería e libraría. Ademais, terán a ocasión de degustar crêpe, chocolate, viño quente ou doces de Nadal, entre outros.
A característica feira tamén contará cunha zona infantil aberta de 11.30 a 13.30 horas, onde se desenvolverán obradoiros de adornos de Nadal con materiais naturais e de reciclaxe totalmente gratuítos.
Cómpre destacar que os contidos do mercado se irán intercambiando con outra instalación similar en Vilagarcía para conferir unha maior variedade aos produtos en venta.
A inauguración terá lugar mañá, ás 18.00 horas, e pouco despois, ás 18.30 horas, celebrarase un obradoiro gratuíto de guirnaldas de Nadal dirixido a tódolos públicos.
Por outra banda, o sábado, 28 de decembro, dará cabida a partir das 18.00 horas a outro taller gratuíto de menú de fin de ano saudable coa nutricionista Laura Rial, incluíndo degustación.
O horario do mercado será de 11.00 a 14.00 e de 16.00 a 21.00 horas, desenvolvéndose tódolos días ata o 5 de xaneiro, agás o 25 de decembro e o 1 de xaneiro.
