A Pobra do Caramiñal celebrou na tarde de onte unha sesión plenaria urxente e extraordinaria. Charo Varela, de Nós Pobra, explicou que a razón da convocatoria fundamentábase en aprobar unha serie de partidas para o uso do remanente de 1.357.367’91 euros, dos cales son utilizables 723.621’82 euros, considerando que as obras que se levaban eran “importantísimas.”
Tanto a voceira do BNG, Amparo Cerecedo, coma o portavoz do PP, Manuel Durán, expresaron reiteradamente a falta de tempo para estudar os puntos que se levaban na orde do día, así como a escasa información sobre o contido dos mesmos.
A concelleira de Servizos Sociais, Servizos Municipais e Benestar Animal, Estefanía Ramos, manifestou a necesidade dun brazo hidráulico para desbroce, unha pa retroescavadora e unha serie de contedores para o lixo. O punto saíu adiante cos votos a favor de Nós Pobra e PSdeG-PSOE, absténdose PP e BNG.
A continuación, o edil de Seguridade Cidadá, José Andrés Lojo, expuxo que era preciso adquirir un vehículo para a Policía Local e outro para Protección Civil. A cuestión foi aprobada cos votos favorables de Nós Pobra e PSdeG-PSOE, absténdose PP e BNG.
Despois, tratouse o punto relativo ao crédito extraordinario para a reforma integral do Camiño Real fase 2, sendo aprobado por unanimidade.
A concelleira de Cultura, Patricia Lojo, abordou o asunto de destinar unha partida para a adquisición da Casa da Cadea, a cal se dedicará a uso municipal. Saíu adiante cos votos a favor de Nós Pobra e PSdeG-PSOE, a pesar dos votos en contra do PP e a abstención do BNG.
Pola súa parte, a edil de Facenda, Charo Varela, expresou que se o remanente non se gasta en investimentos é obrigado empregalo para amortizar a débeda, destinando así 36.539’51 euros. O punto foi aprobado cos votos favorables de Nós Pobra e PSdeG-PSOE, absténdose PP e BNG.
Finalmente, a concelleira de Deportes, Genoveva Hermo, explicou que, a pesar de que xa se iniciaron as actuacións no polideportivo municipal situado na rúa Venecia, non era posible rematalas antes de que conclúa o ano. Deste xeito, resultaba preciso volver a aprobar o investimento ao rematar a prórroga, saíndo adiante por unanimidade.
