O BNG de Ribeira presenta alegacións para reducir a suba de cen euros anuais en saneamento

O grupo municipal do BNG considera “escandalosa” a modificación proposta polo goberno ribeirense no que respecta á taxa de saneamento, contemplándose unha suba de ao redor dos 100 euros anuais. Neste senso, veñen de rexistrar alegacións cunha batería de medidas destinadas a “beneficiar ao conxunto da veciñanza, negocios e colectivos bonificados”, ademais de frear “esta suba por unha planificación nefasta.”

Os concelleiros Xosé Vázquez Cobas e Luís Pérez Barral entenden que o Concello de Ribeira debe garantir un sistema de depuración de augas residuais cun funcionamento correcto que preserve o medio natural e mariño, pola riqueza e diversidade que este presenta, así como porque é o medio de traballo de centos de persoas ligadas á actividade do mar, pero “debe ter uns custes razoábeis.”

Os nacionalistas explican que no prego de cláusulas que o Concello estableceu pódese ver que o custe total da explotación é de 1.454.688’81 euros/ano, IVE incluído, que se distribúen da seguinte maneira: custes de mantemento (424.800 euros), custes mantemento (100.470 euros), custes variables de subministración enerxía eléctrica (300.000 euros), custes cumprimento autorización de vertedura (132.000 euros), custes asociados a medios externos ao servizo (53.000 euros), gastos xerais (131.335 euros), beneficio industrial (60.616 euros).

Dentro desta estrutura de gastos o Bloque non formula rebaixar os custes de mantemento, ao incluírse os salarios do persoal e “co fin de garantir unhas condicións laborais e un salario digno.” Ademais dentro dos custes de mantemento e asociados a medios externos, cren que tampouco se debe reducir por estar incluídas as limpezas periódicas necesarias para evitar cheiros e que o sistema deixe de funcionar, polo que o mantemento “debe ser un dos puntos clave posto que un mal coidado da infraestrutura causará problemas á veciñanza e tamén ao medio natural.”

Non obstante, os nacionalistas opóñense ao “tarifazo” en relación á cifra mencionada anteriormente, pois consideran esta cantidade “totalmente insostíbel para as economías da clase traballadora.”

O edil Luís Pérez Barral manifesta que esta medida débese ao “nefasto modelo escollido polo Partido Popular ao facer unha macrodepuradora que ten que impulsar os residuos durante quilómetros até chegar a Couso.” Segundo argumentou, “o modelo promovido polo Bloque sempre foi outro, consistente na construción de dúas depuradoras o que permitiría rebaixar tanto o custe enerxético da estación como o dos bombeos e, por conseguinte, o custe total da explotación.”

Pérez Barral detallou que as posibilidades para rebaixar o custe que terá a infraestrutura pasan por atallar o gasto de electricidade, polo que a proposta que fai o Bloque é que se realice unha auditoría do gasto enerxético para analizar medidas que permitan diminuír o consumo eléctrico. Tamén propoñen que o Concello de Ribeira faga investimentos para producir electricidade a partir de fontes renovables, nomeadamente en enerxía solar e eólica de pequena escala. Tal e como expuxo Pérez Barral, “a electricidade producida iría destinada ao autoconsumo de toda ou parte da demanda de consumo da propia EDAR e, polo tanto, permitiría rebaixar directamente o recibo.”

Por outra banda, para conseguir unha rebaixa directa dun mínimo de 21 euros á veciñanza, propoñen que o Concello de Ribeira destine 250.000 euros para impedir a referida suba “co fin de evitar que sexa insoportábel para a economía de moitas persoas.” Deste xeito, indican que a partida iría reducíndose medida que se vaia producindo electricidade a partir das citadas fontes renovables.

Con respecto ás reducións, o Bloque cre que é “claramente insuficiente” que só poidan optar á redución do 50% do custe as persoas que cobran a Renda de Inclusión Social de Galicia (RISGA), polo que propoñen aumentar as reducións aos colectivos máis vulnerables que poden acollerse a estas reducións coma, por exemplo, as persoas que cobran pensións non contributivas, persoas con discapacidade recoñecida e as unidades familiares que teñan uns ingresos iguais ou inferiores a 2’5 veces o Indicador Público de Renda de Efectos Múltiples (IPREM).