A Plataforma Stop Deshaucios Barbanza, a través do seu vogal José Manuel Pena, está a enfiar a recta final de ano cun manifesto que compendia e visualiza as que, ao parecer da organización comarcal, son as materias pendentes sociais máis urxentes cuxa resolución tería que acometer de inmediato o Goberno galego. O comunicado, unha carta de desexos ao presidente da Xunta, é un recordatorio dalgunhas das principais ameazas coas que teñen que convivir centos de familia dos nosos concellos: desemprego, imposibilidade de asumir os pagos das hipotecas, desaloxos por impago de alugueres, imposibilidade de acceder a unha vivenda digna, etc.
En palabras da plataforma, “son demasiadas as persoas novas e maiores con problemas desta índole, faltan oportunidades en xeral para a xente nova, por non falar do que acontece cos investigadores novos que se ven obrigados a emigrar para atopar unhas mellores condicións laborais e salarios máis elevados”. Stop Desafiuzamentos Barbanza tamén lembra que existe unha porcentaxe alta de mozos e mozas que non son quen de emancipase das súas familias por ausencia de recursos e oportunidades, por mor duns “traballos temporais e precarios”, polo que boa parte deles e delas vense abocados á situación de ter que marchar da súa terra.
Respecto das persoas maiores, a plataforma avoga por unha meirande aplicación das políticas sociais, “reais e efectivas”, tendentes a crear máis centros de día, máis centros de maiores, máis xeriátricos, transporte público de balde e unha atención a domicilio máis integral.
