Máis de 200 referencias vinculadas coa tradición Xacobea no itinerario do camiño que une Corrubedo e Santiago

21 Decembro 2019

Máis de 200 referencias materiais datadas entre os séculos XIV e XXI constatan a existencia do Camiño de Santiago ‘A Orixe’ que foi presentado
oficialmente no Hostal dos Reis Católicos. Boa parte delas forman parte dunha exposición itinerante que acaba de ser inaugurada na Casa do Concello de Riveira. O título da mostra, “A Pegada do Camiño de Santiago na Barbanza: A Orixe”.
A exposición está promovida pola Asociación do Camiño de Santiago do Barbanza A Orixe e comisariada por Antonio González Millán. Compóñena un total de 40 paneis con imaxes alusivas ás evidencias históricas da existencia desta ruta xacobea, tomadas polo fotógrafo Adolfo Enríquez Calo, galardoado en múltiples ocasións co Premio Lux de Fotografía Profesional.
Presentado por Pastor Rodríguez, o acto contou cunha numerosa presenza de asistentes interesados en coñecer de primeira man o contido da mostra, que recalará nos vindeiros meses nos outros municipios que forman parte do camiño de 112 kilómetros de traxecto que une Corrubedo e Santiago: A Pobra, Boiro, Rianxo, Dodro e Padrón.
Durante a inauguración, o presidente da asociación promotora, Manuel Mariño, manifestou que o que se propón a entidade é recuperar o noso patrimonio e a nosa propia identidade en relación ao camiño de compañamento do Apóstolo Santiago, cuxo corpo chegou ata a Iria Flavia a bordo dunha barca de pedra tras remontar pola bocana da ría de Arousa. Tamén falou o arcipreste de Postmarcos, Manuel Antonio Villar, quen recordou que a orixe da asociación tivo lugar fai tres ou catro anos cando despois de facer un grupo de persoas as últimas etapas do Camiño de
Santiago se preguntaron: “e por que nós non?”.

Antonio González Millán lembrou que a primeira vez con que se suxeriu a posible existencia desta ruta xacobea tivo lugar no 1993 nun artigo escrito por el nun xornal e que despois dun exhaustivo traballo de investigación afloraron máis de 200 referencias sobre a mesma, parte das cales se exhiben na exposición. Tamén manifestou que a raíz da presentación de antonte no Hostal dos Reis Católicos xa hai un operador turístico alemán interesado en ofrecer información no seu territorio.
Así mesmo, agradeceu a colaboración dos alcaldes dos municipios afectados, o primeiro dos cales en abrirlles as portas foi o de Ribeira, Manuel Ruiz. Este último, durante a súa intervención, agradeceu o gran traballo realizado e confesou que cando el mesmo especulaba coa posibilidade dun camiño xacobeo polo Barbanza pensaba que estaba solo e, en realidade “estaba perdido” ao abeiro de tantísimas persoas que estaba traballando precisamente na súa recuperación.
Ao finalizar o acto, Antonio González Millán distinguiu ao público cunha pormenorizada ruta guiada por cada un dos 40 paneis que compoñen a mostra con todas as evidencias en forma de cruceiros, retablos, conchas, efixies do Apóstolo, hospitais de pelegríns, etc que dan fe da existencia do camiño ademais de existir un numeroso patrimonio inmaterial formado por lendas, contos e tradicións.

Acto inaugural de “A Pegada do Camiño de Santiago na Barbanza: A Orixe”.
O comisario da mostra “A Pegada do Camiño de Santiago na Barbanza: A Orixe” Antonio González Millán fai unha pormenorizada ruta guiada por cada un dos 40 paneis
Mostra “A Pegada do Camiño de Santiago na Barbanza: A Orixe”.

Outros artigos

O Concello de Ribeira reforza o alumeado público na rúa de Galicia

O Concello de Ribeira informou dun reforzamento do alumeado público nalgunhas contornas do centro urbano da cidade, concretamente no treito da rúa Galicia comprendido entre o Mercado Municipal e o cruzamento co Parque García Bayón. Segundo informaron fontes do...

+

Publicidade

Revista en papel

Opinión

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

“Good morning, Baltimore”. Antón Luaces

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...