Unha nova actuación no concello de Ribeira permitirá a pavimentación e instalación de rede de pluviais na zona coñecida como Pedra do Pino, na parroquia de Corrubedo, dándolle continuidade á implantación de saneamento desenvolvida o ano pasado.
A intervención comprende dúas vías, unha con pavimento de terra e outra con aglomerado asfáltico en mal estado e con sobreanchos en terra ata os peches contiguos.
O proxecto técnico elaborado polos servizos do Concello inclúe a instalación dunha rede para drenaxe de pluviais consistente en dúas tubaxes de 315 milímetros de diámetro e 156 e 250 metros de longo que descorrerán polo centro da calzada na vía principal que enlaza por un lado coa estrada de entrada ao pobo e por outro coa rúa Delicias. En canto á outra vía, a solución adoptada é a construción de cunetas. No que se refire á pavimentación, realizarase con aglomerado asfáltico en quente nunha superficie de 3.841 metros cadrados, incluíndo os sobreanchos. Ademais, nunha determinada zona construirase un tramo de 125 metros de longo de beirarrúas a base de baldosa hidráulica e bordillo prefabricado de formigón.
O importe da actuación ascende a 118.133’85 euros, IVE incluído, financiadas no marco do Plan Provincial de Cooperación ás Obras e Servizos de Competencia Municipal (Plan Único de Concellos) POS+2018; e o prazo de execución son tres meses.
As empresas interesadas en presentar ofertas dispoñen ata a medianoite do 9 de xaneiro de 2020 a través da Sistema de Licitación Electrónica da Xunta de Galicia (SILEX).