A Asociación Compostelá de Esclerose Múltiple (ACEM), celebra cada 18 de Decembro o Día Nacional da Esclerose Múltiple con ese motivo realiza diferentes actividades para concienciar e poñer de manifiesto a situación das persoas afectadas por esta enfermidade neurodexenerativa e lembrar algunhas das súas liñas de traballo. Asi hoxe 18 de Decembro, instalará en horario de 9:00 h. a 14:00h. dúas mesas informativas e de captación de fondos no CHUS.
A Esclerose Múltiple é unha enfermidade crónica autoinmune, desmielinizante, neurodexenerativa e progresiva do Sistema Nervioso Central. Os síntomas tempranos máis habituais son a fatiga, problemas de visión, formigueos, entumecementos, vértigos e mareos, debilidade muscular, espasmos e problemas de equilibrio e coordinación. Moitas manifestacións da enfermidade son ‘invisibles’, pero inciden no día a día destas persoas. A incapacidade que provoca caracterízase por trastornos motores, cognitivos e da agudeza visual, acompañada doutras alteracións como ansiedade e depresión.
ACEM únese ao resto de organizacións de persoas con Esclerose Múltiple baixo o lema “Xuntos somos máis fortes que a Esclerose Múltiple”para reivindicar aqueles aspectos que poden mellorar a calidade de vida das persoas con Esclerose Múltiple e que detallamos a continuación.
Reivindicacións das Persoas con Esclerose Múltiple
- O recoñecemento automático do 33% de discapacidade co diagnóstico, o que suporía un mellor acceso a medidas de protección social e ao emprego de persoas con Esclerose Múltiple.
- Maior apoio gubernamental á investigación da esclerose múltiple.
- Acceso a un tratamento rehabilitador integral, personalizado, gratuito e continuado, en todas as comunidades autónomas, reforzando o papel que as organizacións de pacientes desenvolvemos neste campo.
- Equidade no acceso ao tratamento farmacolóxico que precise cada persoa, en todas as comunidades autónomas e en todos os centros hospitalarios.
- Maior compromiso dos empresarios nas adaptacións dos postos de traballo e no cumprimento do 2% que esixe a lexislación na contratación de persoas con discapacidade.
