Na madrugada do martes ao mércores remata definitivamente a relativa calma coa entrada dun novo temporal que xa se está a deixar notar na costa de Barbanza. O fenómeno meteorolóxico adverso, que irá a máis a medida que avance o mércores, achegará unha xornada especialmente complicada para o litoral da Coruña e Pontevedra, polo que a Dirección Xeral de Emerxencias activará a partir da madrugada a alerta laranxa. Haberá ventos de compoñente sur que poden chegar a forza 9 con mar combinada do sur con ondas de até seis metros. A orientación do vento e o mar fará que a ría de Arousa, xeralmente abrigada, tamén teña mar picada.
Unha vez máis, por mor do temporal costeiro a Xunta lembra a importancia de manternos afastados da liña de costa, isto é, de diques, rompentes, espigóns, peiraos, praias, paseos marítimos, e todas aquelas zonas que poidan ser varridas polo mar, co fin de previr un eventual golpe de mar que poida arrastrar persoas ou obxectos. É preciso ademais evitar aproximarse e vixiar posibles caídas de obxectos de balcóns e fiestras.
Tamén se aconsella a suspensión das actividades pesqueiras e marisqueiras como medida preventiva naquelas zonas máis perigosas, así como extremar as medidas de seguridade á hora de realizar calquera actividade no mar e revisar os cabos e amarres das embarcacións.
Suspéndese as actividades dos colexios ao aire libre
A maiores de todo o devandito e debido ao mal tempo reinante, a Comisión Escolar de Alertas decidiu suspender este mércores as actividades no exterior dos centros docentes radicados na zonas decretadas con alerta laranxa por refachos de vento superiores a 100 quilómetros por hora dende as 9.00 horas até as 21.00. Isto afectará ao oeste da provincia da Coruña, a Mariña de Lugo e a montaña de Ourense. No que se refire á comarca de Barbanza, están incluídos no aviso todos os concellos.
