Félix Rodríguez e Fran Rei subiranse ás táboas do pobrense Elma ás 18.30 horas deste venres 27 para escenificar Saaabor!, de Culturactiva. Dirixido por Avelino González, trátase dun espectáculo cómico que mestura música, maxia, humor, ritmo e participación do público, co mundo da gastronomía de fondo. Así, os protagonistas convértense en dous recoñecidos chefs que ofrecen pratos para tódolos gustos: desde a comida máis práctica e sinxela ata a máis elaborada, sen esquecer o viño e a sobremesa, dando lugar a un saboroso menú para toda a familia.
A entrada é libre e ata completar aforo. A actividade está organizada pola Concellería de Cultura da Pobra do Caramiñal en colaboración coa Rede Cultural da Deputación da Coruña.
