O Departamento de Deportes do Concello de Boiro atópase preparando unha Gala do Deporte na que se pretende render homenaxe a tódolos deportistas e clubs do municipio que destacaron no eido deportivo durante o 2019, así como facer entrega das becas que o Concello concede aos deportistas locais polos seus méritos.
A gala, que será conducida por José Triñanes, celebrarase o vindeiro 27 de decembro, ás 20.00 horas, na Casa da Cultura de Boiro. O obxectivo deste acto é reunir a deportistas, clubs e persoas vinculadas co deporte do concello nunha celebración conxunta para recordar e homenaxear os logros acadados durante o 2019.
As becas que o Concello de Boiro reparte cada ano premian os logros e méritos dos deportistas do municipio, entregándose un total de 25 bolsas que oscilan cunha dotación de entre os 300 e os 100 euros, pretendendo axudar e fomentar o deporte base. Ademais destas achegas, procederase á distinción de persoas e clubs que gañaron en campionatos ou competicións galegas e nacionais durante este ano.