A semana pasada presentouse unha nova web galega destinada a preservar, visualizar, reivindicar e compartir a riqueza galega en materia de nomes de lugar. Trátase de Galicia Nomeada, unha plataforma participativa que nace directamente dun caso singular e único a nivel europeo: non existe ningún outro país coma o noso que atesoure tantos e tan variados topónimos de terra e mar (talasonimia). Na presentación destacouse “o caso único galego”, tanto pola cantidade como pola antigüidade e a densidade de denominacións por km2.
O proxecto, que foi desenvolvido pola Axencia para a Modernización Tecnolóxica de Galicia (AMTEGA) en colaboración coa Real Academia Galega (RAG), é unha ferramenta de gran utilidade para todas as galegas e os galegos. No caso de Barbanza, ten ademais o engadido extra de achegar unha serie moi relevante de topónimos: por exemplo os dos concellos de Porto do Son (con 4.555), Lousame (3.703) e Ribeira (1.112), que se atopan entre os municipios que máis nomes de lugar achegan a nivel galego, en boa medida polo seu importante tamaño, polo diseminado das súas poboacións en amplas franxas de territorio e, tamén, polo destacado traballo de transmisión de coñecemento levado a cabo polas xeracións máis veteranas. A un nivel máis concreto, son dignas de terse en conta as fundamentais contribucións de (no caso do concello ribeirense) Aguiño e Castiñeiras (con preto de 160 rexistros), Corrubedo e Olveira (con máis de 200) e Oleiros (con preto de medio milleiro). Tamén é salientábel a riqueza documentada do Rianxo e a súa contorna, dos preto de 400 de Taragoña e os outros tantos de Brión e Leiro.
Portal e apliación
A plataforma Galicia Nomeada ten versión de escritorio e aplicación dispoñíbel para móbiles con Android e iOS. Entre outras funcionalidades interesantes, permite a colaboración da cidadanía na recolleita da nosa microtoponimia, o seu rexistro nunha base de datos, a súa xeorreferenciación e a difusión a través dun visor de topónimos desde o propio Portal de Toponimia de Galicia.
Como usala e como participar
A través dunha interface sinxela e intuitiva, permite introducir e localizar microtopónimos de forma individual, aos que se lle pode engadir unha imaxe, arquivos de son e vídeo (formatos MP3 e MP4) e textos explicativos, todo para favorecer, baixo supervisión dun equipo de especialistas do Seminario de Onomástica da RAG (que contrastará e verificará a súa existencia), achegas “de gran valor informativo ao xa rico patrimonio toponímico do país e referencia para os traballos da Administración pública, a investigación, o sector empresarial e a sociedade en xeral”, informaron a semana pasada a RAG, Vicepresidencia, Política Lingüística e máis AMTEGA, lembrando tamén que quen desexe colaborar no proxecto ten ao seu dispor un formulario de contacto online, onde, alén dos seus datos persoais, deberá indicar os motivos que o levan a participar no proxecto e os lugares, aldeas ou concellos nos que vai traballar.