Boiro celebrará entre o 6 e o 8 de decembro as festas patronais de Santa Baia, organizadas pola propia comisión de festas. O programa de festexos coincide cuns días de moita actividade cultural no concello ao dar inicio ás actividades de Nadal e o acendido de alumeado. Ao acto de presentación asistiron a concelleira de Cultura, María Outeiral; o membro da comisión de festas de Santa Baia, Eugenio Silva; e o belenista Carlos Nieto.
Estas festas patronais contan cun amplo programa de actividades que comezan o venres 6 coa verbena da orquestra Compostela, a partir das 20.30 horas. Na mañá do sábado 7, haberá pasarrúas a cargo da Banda Municipal de Boiro; mentres que a noite será amenizada pola orquestra Alkar. O domingo 8, pola mañá haberá un pasabares con grupos tradicionais e, ao mediodía, na praza do Concello, a III Festa dos Callos.
A edil María Outeiral aproveitou a ocasión para falar do programa complementario de actividades que por parte da Concellería van ter lugar na xornada do sábado 7 con motivo do acendido da iluminación de Nadal. Ademais, ás 17.00 horas está prevista a inauguración do Belén municipal, realizado polo maquetista Carlos Nieto, e que estará aberto ao público ata o 6 de xaneiro.
Despois dese acto, haberá actuacións itinerantes polas rúas con Brassica Rapa e, ás 18.00 horas, os membros da Asociación Amicos realizarán xogos inclusivos na rúa peonil para, ás 19.00 horas, proceder ao acendido simbólico do alumeado e dar por inaugurado o Nadal en Boiro.