As actividades da Rede de Dinamización Lingüística chegan á Pobra e á Ribeira

A Rede de Dinamización Lingüística vai rematar o ano cun completo programa de actividades destinado a celebrarmos as festas en galego. Este ano, chegará a 31 concellos da Rede de Dinamización Lingüística que se completarán con recursos para celebrar o Nadal en galego. Na axenda inclúese (entre outras cousas) a representación de O vixilante dos soños, unha obra de teatro a cargo do grupo Ubú que xira arredor dun personaxe chamado Sonólicus que dende pequeno ten a teima de durmir ben apegado á xanela e o último que ve antes de pechar os ollos é a faciana redonda e resplandecente da lúa. Chegará, entre outros, ao concello de Pobra do Caramiñal (Teatro Elma) o día 7 de xaneiro ás 18.00 horas.

Outra das actividades da Rede galega de Dinamización de Lingüística son os obradoiros que dirixe a psicóloga Cándida Rodríguez Ferro sobre a importancia das avoas e os avós como “transmisores da lingua e a cultura galegas”. A actividades está dirixida tanto aos maiores coma aos seus fillos e netos. O proxecto concíbese como un instrumento para a socialización entre novos e anciáns e fai posible o achegamento entre diferentes formas de entender a realidade social e lingüística. Os obradoiros visitarán unha decena de concellos, incluído o de Ribeira (o día 21 de decembro, no Centro Cultural Lustres Rivas ás 10.30 horas).