A adxudicación con carácter provisional dunha nova actuación permitirá a dotación de novo aglomerado na rúa Atalaia, na parroquia ribeirense de Corrubedo, unha das máis transitadas ao servir como unha das principais vías de entrada e saída de tráfico rodado.
A empresa que resultou mellor clasificada das 11 ofertas presentadas foi Nemesio Ordóñez. A obra comporta un investimento de 30.056 euros, IVE incluído, financiados no marco do Plan de Obras e Servizos (POS) provincial e o prazo de execución son dous meses.
Desde o Concello manifestan que o pavimento desta rúa está bastante deteriorado, razón pola cal se elaborou un proxecto dirixido a mellorar o firme cunha nova pavimentación asfáltica de 6 centímetros de espesor por unha extensión de 1.018 metros cadrados, previo fresado parcial do actual pavimento e limpeza das marxes.
