Na tarde do 24 de decembro, axentes da Policía Local de Rianxo procederon á localización e identificación do causante dun accidente con feridos na estrada AG-11. Os feitos sucederon ao redor das 18.30 horas cando o identificado colisionou por alcance con outro vehículo que circulaba en dirección a Padrón e, a continuación, ausentouse do lugar. A consecuencia do choque, o ocupante do outro vehículo resultou ferido e necesitou a asistencia de persoal do 061.
Unha vez establecido o correspondente dispositivo para dar co causante, a patrulla de servizo atopouno a quilómetro e medio do lugar do accidente. Ao parecer, o condutor trataba de ocultar o seu vehículo nunha pista forestal. Ademais, foi sometido á proba de alcoholemia, arroxando un resultado positivo.
Por todo isto, a Garda Civil de Tráfico instruíu dilixencias por delito contra a seguridade viaria e abandono do lugar do accidente.
