Numerosas propostas compoñen o calendario deste venres 6 coas que o municipio pobrense dará a benvida ao Nadal. Así o deron a coñecer o alcalde Xosé Lois Piñeiro; a concelleira de Servizos Sociais, Servizos Municipais e Benestar Animal, Estefanía Ramos; e a súa homóloga de Igualdade e Dinamización Económica, Charo Varela.
A edil Estefanía Ramos explicou que o acendido do alumeado terá lugar na praza Maior, ás 18.45 horas, para, a continuación, proceder á inauguración do Belén municipal situado na praza do Emigrante, lugar onde tamén ofrecerá unhas palabras o rexedor. O encargado de acender as luces será elixido mediante sorteo entre os nenos participantes no contacontos a cargo de Troskita que se celebrará na praza Maior, a partir das 18.00 horas. Ademais, Estefanía Ramos destacou o traballo e coordinación dos diferentes departamentos, así como de Protección Civil e Policía Local.
Pola súa parte, a concelleira Charo Varela anunciou que no Cantón da Leña estará emprazado un mercado de Nadal, composto por seis postos do comercio local dedicados á artesanía, gastronomía, obxectos de regalo e arranxos florais, entre outros. Así mesmo, explicou que contarán con obradoiros de pintacaras e purpurina dirixidos aos máis pequenos da casa. Posteriormente, haberá chocolatada e agardan “contar con todo o mundo que queira desfrutar dun día de Nadal tan estupendo.” Por outra banda, expuxo que comezarán coas actividades de Pequetroula.
Na súa intervención, o alcalde Xosé Lois Piñeiro manifestou que “a intención é favorecer o comercio local e tamén dinamizar a vida social do noso municipio a través de actividades.” Neste senso, cualificou a programación de “extensa e competitiva con outros concellos.” Así mesmo, salientou que desde que chegaron ao goberno foron incrementando o alumeado de Nadal, o cal este ano irá acompañado doutro tipo de decoración coma a que loce na fachada da Casa Consistorial.
