Onte @s runners montañeir@s foron protagonistas informativos en Barbanza. O motivo? A presentación en Porto Son da sexta convocatoria do Circuíto Revolutrion Trail Series, composto de cinco carreiras a desenvolver no primeiro semestre de 2020 noutros tantos percorridos pola nosa contorna: por Ribeira (o da Cidá, o 26 de xaneiro), pola Pobra (o de San Isidro, o 16 de febreiro), por Portosín e Porto do Son (o de Xtosín, o 15 de marzo), por Noia (o do monte San Lois, o 19 de abril) e pola serra do Barbanza (a andaina Barbanza42k, prevista para o 10 de maio).
Na presentación deste xoves 19 de decembro púxose o foco nos detalles de todas e cada unhas probas e no feito de que cada ano que pasa obteñan máis repercusión e participantes. A previsión este ano é superar os 1.600 corredores en total acadados na anterior edición. O programa deportivo, como lembraremos, vén da man da asociación Arousa Natureza e Ocio coa colaboración dos concellos de Ribeira, A Pobra, Porto do Son e Noia. Na páxina web do dito colectivo comarcal, www.arousa.com, temos toda a información que precisamos para preparar a nosa participación en calquera das ditas probas.
Segundo fixo saber a asociación, cada percorrido incluído ten “identidade propia, todos son diferentes entre si e con respecto aos das anteriores edicións”. Unha grandes novidades deste ano é a estrea do circuíto noiés, o Trail de San Lois, que “vén para deixar unha pegada profunda nos camiños de Noia”. Outra das novidades importantes radica na relevancia que Arousa Natureza lle quere dar ás mulleres, promovendo que todos os equipos (se desexan puntuar coma equipo e optar aos premios por carreira e do circuíto) incorporen presenza feminina nas súas fileiras. Esta aposta pola diversidade e a igualdade garantirase co feito de que as corredoras sexan as que rematen de sumar na puntuación final.
A axenda deportiva do Circuíto Revolutrion Trail Series comeza este mes de xaneiro, o 26, co Trail da Cidá. Trátase da cuarta edición deste percorrido en particular, un sub-circuíto espectacular con impresionantes vistas da contorna do Parque Natural de Corrubedo e que xa ten máis que consolidado o seu importante tirón entre corredores e corredoras de toda a xeografía galega. Este ano a organización renovou o trazado en máis dun 80% con respecto ao do ano pasado, incluíndo novas sendas, novos camiños, novas paraxes, e un treito do percorrido polo Parque Natural do Corrubedo e O Vilar. Terá unha distancia de 14 quilómetros e un desnivel de 629 metros. A hora de saída está prevista para as 11.00 horas, dende a praza do Concello de Ribeira. A cota por participar é de 10 euros. O período de inscricións está aberto até o 22 de xaneiro.
