Seguindo o fío da reivindicación dos dereitos da muller e do compromiso pola igualdade, un fío de mobilización e protesta colectiva, o Auditorio de Rianxo vai acoller a partir do 9 de decembro unha destacada mostra fotográfica sobre a realidade de Nicaragua e a loita das mulleres no país, asoballadas pola perpetuación do patriarcado, os prexuízos, a violencia e a falta de oportunidades. A exposición Resistencia nicaraguana con rostro de muller estará visíbel até o 14, sábado, xornada na que se pechará coa realización de diferentes actividades.
Por exemplo unha visita guiada pola exposición, un obradoiro de máscaras de monimbó (cada participante vai poder deseñar a súa propia máscara de monimbó, elementos empregados en bailes folclóricos pero tamén para tapar os rostros nas protestas e evitar a identificación polas autoridades), e unha actuación musical a cargo do coro feminino Sisters in the House.
