Con motivo do Nadal, o complexo deportivo da Fieiteira organiza unha serie de actividades especiais, incluíndo tanto xornadas de portas abertas a toda a cidadanía coma masterclass de zumba, ioga ou bike destinadas aos usuarios das instalacións; ademais doutros eventos.
Neste senso, os días 24 a 31 de decembro, en horario de 07.00 a 14.00 horas, desenvolveranse sendas xornadas de portas abertas nas que se poderán utilizar as instalacións do complexo de maneira gratuíta sen necesidade de ser usuario.
Ademais, celebraranse outras accións, previa inscrición nos listados dispoñibles no complexo: Masterclass Especial Zumba o 26 de decembro, de 21.00 a 22.00 horas, no polideportivo; Masterclass Especial Zumba +60 o 3 de xaneiro, de 11.00 a 12.00 horas, no polideportivo e dirixido a persoas maiores; Especial Bike o 27 de decembro, de 09.15 a 10.15 horas; Especial Bike + Circuit o 3 de xaneiro, de 09.15 a 10.45 horas, clase de bike intercalada cun circuit de tonificación na sala de bike e no polideportivo; e Masterclass Especial Ioga o 27 de decembro, de 11.00 a 12.00 horas, na sala do ximnasio.
Por outra banda, os días 23, 26, 27 e 30 de decembro, así como o 2 e 3 de xaneiro, haberá un servizo de ludoteca para persoas usuarias do complexo, polo que poderán deixar aos seus fillos -con idades comprendidas entre os 4 e 10 anos-, mentres practican actividade física nas instalacións.
Así mesmo, desde a Concellería de Deportes prográmanse para estas datas outras actividades fóra das instalacións coma clases gratuítas de pádel, o BTT de Nadal, o clásico torneo de tenis, campionatos de xadrez de Nadal e Reis e outras novidosas iniciativas.
