A Asociación AMBAR, a histórica entidade de inclusión social con sedes en Ribeira e A Pobra, quixo rematar o ano mostrando a veciñanza o resultado dos traballos realizados polos membros da asociación no proxecto de Xardín Sensorial, unha iniciativa que promove o desenvolvemento cognitivo e psicomotriz das persoas con diversidades funcionais. Segundo informa AMBAR, os traballos despregados nas instalacións da asociación chegaron con esta recta final de ano ao seu remate.
A iniciativa implicou o acondicionamento primeiro dos terreos e logo a incorporación de todo tipo de elementos vexetais e minerais, todos eles artellados e dispostos de maneira artesanal e co obxectivo de ofrecer un ámbito de lecer creativo, enriquecedor e de propiedades terapéuticas.
O proxecto foi posíbel grazas a unha subvención de Política Social da Xunta, destinada á realización de programas de carácter social, cun cargo á asignación tributaria do 0,7% do IRPF.
Para quen non o saiba, un xardín sensorial é unha contorna deseñada para estimular os sentidos de quen lle dá forma e, tamén, de quen o visita. A estimulación prodúcese polo beneficio das plantas e o uso de elementos auditivos, visuais, táctiles, gustativos e olfactivos.
