O Mercadiño de Nadal que acolle estes días a Porta do Sol de Ribeira está a ser un éxito de público, malia as inclemencias climáticas dos días pasados (o tren de temporais que hoxe deu finalmente un respiro e que todo apunta a que non volverá visitarnos en cuestións de días). De feito, na mañá soleada deste xoves 26 de decembro a feira comercial de artesanía e produtos creativos e ecolóxicos foi un punto de encontro de residentes e visitantes, que puideron coñecer de primeira man a completa oferta de produtos das diferentes casetas do mercadiño (adobíos, plantas, xoias, roupa, artesanía, libros, etc) e mesmo participar nas actividades para nenos e maiores que se organizan nel.
Sinalar que o que puido ver a veciñanza até hoxe mudará en cuestión de horas, xa que dentro da axenda do Mercadiño figura a previsión de mudar o contido dos expositores logo dunha semana da súa posta en marcha (o Mercadiño abriu as súas portas o pasado 20 de decembro). A zona de vendas ficará activa até o 5 de xaneiro, aínda que non o fará o día de Aninovo (como tampouco abriu onte, 25 de decembro). O horario é de 11.00 a 14.00 horas e entre as 16.00 e as 21.00 horas.
Por certo que este 28 de decembro ás 18.00 horas está prevista unha charla divulgativa a cargo da experta en alimentación Laura Rial, dirixida ao público en xeral, na que mostrará algunhas claves prácticas para garantir os menús máis saudábeis nestas festividades. Ademais, o programa de actividades tamén inclúe un espazo infantil con obradoiros e xogos (de 11.30 a 13.30 horas) e máis un taller de elaboración de grilandas do Nadal.
