Talía Teatro leva este venres a Ribeira a súa Vida de Cans

A nova edición da Mostra de Teatro de Ribeira depáranos hoxe unha nova experiencia sobre as táboas, co engadido extra de tratarse dun espectáculo, o deste venres 8 de novembro, concibido por unha das compañías galegas con meirande capacidade de produción e distribución e con máis experiencia nos escenarios (dende finais dos oitenta) dignificando o teatro e a cultura galega: Talía Teatro. Vida de cans, a obra que se representa hoxe (como as outras dez que integran este ano a Mostra do Teatro de Ribeira), comeza ás 21.30 horas no Auditorio Municipal.

Vida de cans é unha obra escrita e dirixida por Candido Pazó e cun elenco formado por Dani Trillo, Toño Casais e Artur Trillo. Segundo informan dende a compañía, o espectáculo recrea para os espectadores a vida de tres actores-cans, tres actores que fan de cans (ou viceversa) sen deixar de ser actores, recluídos nun recinto que lles preparou o seu amo e “demasiado ben tratados, ben atendidos, ben alimentados, ben acariñados… pero recluídos a fin de contas”. Ao longo da obra, irase metendo nas súas vidas, e na dos espectadores, o gume da incerteza sobre o que pode haber fóra do recinto no que viven: a desacougante (e apaixonante) liberdade, o mundo real.