A Sala do Civil e Penal do Tribunal Superior de Xustiza de Galicia (TSXG) rexeitou o recurso do condenado a seis anos de cárcere por trasladar en outubro de 2018 tres quilos de cocaína desde Ribeira ata A Coruña.
Ao acusado interceptouno a Garda Civil cando conducía un vehículo polo barrio de Feáns. Os axentes localizaron a droga oculta baixo unha carcasa e o cadro de mandos do coche. Segundo consta na sentenza, a cocaína comisada tería un prezo de venda de 307.498 euros.
O alto tribunal confirmou a resolución da Audiencia Provincial da Coruña ao rexeitar ter en conta, tal e como demandaba o condenado, as atenuantes de confesión tardía e moi cualificada de drogadicción.
