Rianxo somérxese na ciencia

07 Novembro 2019

No marco simbólico do mes da ciencia e baixo a premisa da cultura científica, técnica e da innovación como piar inescusable do desenvolvemento sociocultural da cidadanía, celebrarase o RianxoCiencia 2019. Esta iniciativa atópase conformada por un conxunto de propostas de promoción e divulgación dirixida a público en xeral, centrado na cultura científica e técnica. Así, o programa nace coa vontade de continuidade nos vindeiros anos e contempla numerosas actividades, todas elas de balde. Ao acto de presentación asistiron o alcalde de Rianxo, Adolfo Muíños; a concelleira de Cultura, Raquel García; e o divulgador Vicente Mohedano.

A edil Raquel García manifestou que o obxectivo deste evento reside en “achegar a ciencia ao público, espertar a curiosidade polo coñecemento”, engadindo que posibilitará “descubrir como se pode explicar o universo de forma divertida, lúdica e moi interesante.”

Na súa intervención, Vicente Mohedano expresou que “o coñecemento é moi atractivo para a xente”, ademais de explicar que Discurshow consiste en discursos teatralizados con conferencias densas, pero “moi atractivas, moi dramatizadas.”

Pola súa parte, o rexedor Adolfo Muíños destacou “a importancia da ciencia nas nosas vidas, a importancia do coñecemento científico que, sobre todo, se ensina nos centros, e os Concellos, dalgunha maneira, acompañamos buscando unha compoñente un pouco máis lúdica, máis informal, máis diferente, pero tamén con esa idea de completar a actividade que se da nos centros de ensino de coñecemento científico e divulgación científica.”

A cita arranca o sábado 9 cun obradoiro de robótica nos baixos da Biblioteca Municipal Castelao. A primeira sesión será de 10.00 a 11.30 horas, destinada a rapazada de 9 a 12 anos; mentres que a segunda terá lugar de 12.00 a 13.30 horas, focalizándose na mocidade de 13 a 16 anos. O número de participantes por sesión establécese en 12, previa inscrición.

O salón de actos do Auditorio de Rianxo acollerá o sábado 16, ás 12.00 horas, o Discurshow: Voute contar! a cargo de Vicente Mohedano e destinado a un público a partir de 8 anos. Pola tarde, ás 19.00 horas, o xornalista de GCiencia, Manuel Rey, ofrecerá unha charla-coloquio baixo o título Ciencia e razón fronte ás pseudociencias, terapias perigosas e outras lerias.

O obradoiro A ciencia nos tempos de Castelao, Dieste e Manuel Antonio chega á Biblioteca o venres 22, ás 18.00 horas. Esta actividade focalízase nun público de 6 a 12 anos, contando con 25 participantes, previa inscrición.

O sábado 23 desenvolveranse dúas citas no salón de actos do Auditorio. A primeira, programada para as 12.00 horas, será Discurshow: Orbitamos! impartida por Vicente Mohedano e dirixida a rapazada a partir de 8 anos. A segunda, ás 19.00 horas, o director do Observatorio Astronómico da Universidade de Santiago de Compostela (USC), José Ángel Docobo, ofrecerá unha charla-coloquio titulada As estrelas e os seus sistemas planetarios (e outras cousas que pasan -ou non pasan- no ceo).

O obradoiro de experimentos A maxia da ciencia! terá lugar o sábado 30 na aula de usos múltiples do Auditorio. A primeira sesión será de 10.00 a 11.30 horas, destinada a rapazada de 9 a 12 anos; mentres que a segunda se celebrará de 12.00 a 13.30 horas, dirixida a mocidade de 13 a 16 anos. O número de participantes por sesión establécese en 25, previa inscrición.

Así mesmo, a sala de exposicións do Auditorio alberga do 25 de outubro ao 30 de novembro a exposición 50 aniversario da chegada do home á lúa.

As inscricións realizaranse na páxina web www.concelloderianxo.gal, no espazo Rianxociencia, e as admisións serán por sorteo, o cal se desenvolverá 2 días antes do inicio de cada actividade. A listaxe de persoas admitidas publicarase unha vez rematado o sorteo, no mesmo espazo.

Organizado polo Concello de Rianxo, este evento conta coa colaboración da Deputación da Coruña, Universidade de Santiago de Compostela (USC) e Arenaria Coordinación.

Outros artigos

Portos de Galicia inicia a concesión para 174 amarres e 470 m² en Rianxo

O investimento previsto polo club náutico é de 1,7 millóns de euros e proxéctase a súa execución en dúas fases coordinadas co plan de reordenación da dársena, que inclúe a remodelación das instalacións pesqueiras e mexilloeiras A Consellería do Mar, a través de Portos...

+

Accidente na AG-11 dirección Padrón, no concello de Rianxo

Os bombeiros do Parque Provincial de Boiro interviron na madrugada deste domingo 20 de abril nun accidente que se produciu no quilómetro 13 da AG-11 dirección Padrón, a altura do concello de Rianxo. O coche bateu contra a meridiana de formigón e posteriormente...

+

Rianxo detén a perda de poboación

Rianxo atópase entre os concellos galegos que foi quen de deter o devalo demográfico, tal e como se desprende dos datos recentes publicados polo Instituto Nacional de Estatística (INE), onde se indica que o concello rexistrou unha habitante máis que na mesma data do...

+

Publicidade

Revista en papel

Opinión

“Portas xiratorias, interese público”. José Luís Calo

“Portas xiratorias, interese público”. José Luís Calo

España ten moito que mellorar na loita contra a corrupción. O Grupo de Estadoscontra a Corrupción do Consello de Europa (GRECO) publicou dous informes deseguimento que avalían o cumprimento por parte de España das súasrecomendacións para previr a corrupción. O “GRECO”...