Co fin de fomentar a sensibilización sobre as vantaxes de empregar o sentido común na estrada e de conducir amodo e respectar os regulamentos e as sinalizacións, a Policía Local de Rianxo e mailo Concello veñen de convocar novamente un casting de Nadal para a gravación dun vídeo spot que será difundido nas redes sociais e noutras canles durante as vindeiras celebracións do remate do ano.
Á realización do audiovisual están convocadas/os veciñas e veciños de todas as idades, poñendo o foco na importancia de traballaren en común para previr os accidentes de tráfico, especialmente frecuentes (por haber máis desprazamentos en todo tipo de estradas -moitos deles nocturnos-, polo mal tempo e por ser máis habitual ca nunca o consumo de alcol e outras drogas).
O casting será realizado o día 17 de novembro, no Cuartel Vello de Rianxo, en horario de 11.00 a 14.30 horas. A Policía Local fixo un chamamento á veciñanza a participar e implicarse na seguridade viaria rianxeira. No vídeo, que non é remunerado, poderán participar, como dixemos, persoas de todas as idades: de 9 a 90 anos. Para máis información sobre a actividade a Policía Local lembra que existe un correo electrónico no que podemos solicitar datos a maiores: merendacreativa@gmail.com.
