No mes de setembro, estudantes do Barbanza puxeron en marcha unha recollida de firmas a través da plataforma www.change.org, expoñendo as súas queixas polo funcionamento do servizo de transporte que comunica aos concellos de Arousa Norte entre si, así como coa capital galega.
Ante esta problemática, os alcaldes dos catro municipios de Arousa Norte, a través da mancomunidade de municipios, reuníronse cos directivos de Arriva, a empresa que fai a ruta desde a comarca do Barbanza ata Santiago de Compostela, co obxectivo de buscar solucións ás deficiencias.
A empresa manifesta que ten á disposición dos usuarios na súa páxina web os horarios de tódalas liñas que fan o traxecto e tamén unha aplicación móbil. Pola súa parte, o Concello de Boiro sinala que son conscientes de que non tódolos usuarios dispoñen de acceso a Internet, polo que se colocaron en tódalas paradas do termo municipal os horarios das liñas de autobús que a empresa facilitou aos concellos.
Así mesmo, procedeuse á dotación de horarios doutras liñas que operan no municipio coma, por exemplo, Boiro-Hospital do Barbanza ou as que van a Cespón, Escarabote e Cabo de Cruz. Ademais, esta información pode consultarse na páxina web www.boiro.gal e na Oficina de Turismo do Concello.
